వక్ఫ్ సవరణ బిల్లు.. రాజ్యసభలో ఎవరి బలాలెంత, ఆమోదం పొందుతుందా?

వక్ఫ్ సవరణ బిల్లుకు లోక్‌సభ ఆమోదముద్ర వేసింది. అయితే లోక్‌సభలో ఆమోదం పొందిన ఈ వక్ఫ్ సవరణ బిల్లు రాజ్యసభలో ఆమోదం పొందుతుందా. రాజ్యసభలో నంబర్ గేమ్ ఎలా ఉంది. అధికారంలో ఉన్న ఎన్డీఏ కూటమికి రాజ్యసభలో వక్ఫ్ సవరణ బిల్లును ఆమోదించుకునే సంఖ్యా బలం ఉందా. రాజ్యసభలో ఈ బిల్లును సమర్ధించే, వ్యతిరేకించే పార్టీలు ఏవి. ఏ పార్టీకి ఎన్ని ఓట్లు ఉన్నాయి అనే వివరాలు ఈ స్టోరీలో చూద్దాం.

వక్ఫ్ బోర్డుకు ఉన్న అపరిమిత అధికారాలను కట్టడి చేసేందుకు కేంద్ర ప్రభుత్వం వక్ఫ్ సవరణ బిల్లును తీసుకువచ్చింది. అయితే ఈ బిల్లును బుధవారం లోక్‌సభలో ప్రవేశపెట్టగా.. సుదీర్ఘ చర్చ తర్వాత ఆమోదం పొందింది. ఇక గురువారం ఈ వక్ఫ్ బిల్లును రాజ్యసభలో ప్రవేశపెట్టారు. రాజ్యసభలోనూ ఈ వక్ఫ్ సవరణ బిల్లుపై చర్చ జరిగింది. ఈ చర్చ సందర్భంగా అధికార, విపక్షాల మధ్య తీవ్ర మాటల యుద్ధం నడిచింది. అయితే ఇండియా కూటమిలోని వివిధ పార్టీల తీవ్రంగా వ్యతిరేకించినప్పటికీ లోక్‌సభలో మెజార్టీ ఉన్న ఎన్డీఏ కూటమి బుధవారం వక్ఫ్ సవరణ బిల్లు 2025ను ఆమోదించింది. ఈ బిల్లుకు అనుకూలంగా 288 ఓట్లు, వ్యతిరేకంగా 232 ఓట్లు రాగా.. ప్రతిపక్ష సభ్యులు ఈ బిల్లుకు 100కు పైగా సవరణలను ప్రతిపాదించగా వాటన్నింటినీ తిరస్కరించారు.

అయితే ఇప్పుడు ఈ వక్ఫ్ సవరణ బిల్లు రాజ్యసభలో కీలకమైన పరీక్షను ఎదుర్కొంటోంది. రాజ్యసభలో ప్రస్తుతం సభ్యుల మొత్తం బలం 236 కాగా.. ఈ బిల్లును ఆమోదించాలంటే అధికార ఎన్డీఏ కూటమికి 119 ఓట్లు అవసరం కానున్నాయి. స్వతంత్ర ఎంపీల మద్దతు, నామినేటెడ్ సభ్యుల బలంతో ఎన్డీఏ కూటమి బలం 125కి పెరిగింది. ఇక ప్రతిపక్ష ఇండియా కూటమిలోని పార్టీల వద్ద 95 మంది సభ్యుల బలం ఉండగా 16 మంది సభ్యులు ఇంకా నిర్ణయం తీసుకోలేదు.

 బిల్లుకు మద్దతు ఇచ్చే పార్టీలు ఎన్డీఏ కూటమి -125 ఓట్లు

బీజేపీ: 98

జేడీయూ: 4

ఎన్‌సీపీ: 3

టీడీపీ: 2

జేడీఎస్: 1

శివసేన: 1

ఆర్‌పీఐ (ఎ): 1

ఏజీపీ: 1

ఆర్‌ఎల్‌డీ: 1

యూపీపీఎల్: 1

ఆర్‌ఎల్‌ఎం: 1

పీఎంకే: 1

టీఎంసీ-ఎం: 1

ఎన్‌పీపీ: 1

స్వతంత్రులు: 2

నామినేటెడ్ సభ్యులు: 6

వక్ఫ్ సవరణ బిల్లును వ్యతిరేకించే పార్టీలు (ఇండియా కూటమి) – 95 ఓట్లు

కాంగ్రెస్: 27

టీఎంసీ: 13

డీఎంకే: 10

ఆప్: 10

ఎస్పీ: 4

వైఎస్ఆర్సీపీ: 7

ఆర్జేడీ: 5

జేఎంఎం: 3

సీపీఐ(ఎం): 4

సీపీఐ: 2

ఐయుఎంఎల్: 2

ఎన్‌సీపీ (శరద్ పవార్): 2

శివసేన (ఉద్ధవ్ ఠాక్రే): 2

ఎండీఎంకే: 1

కేసీఎం: 1

స్వతంత్రులు: 1

విప్ జారీ చేయని పార్టీలు

బీఆర్ఎస్: 4

బీజేడీ: 7

అన్నాడీఎంకే: 4

బీఎస్పీ: 1

విప్ జారీ చేయని పార్టీలకు చెందిన ఎంపీలు ఈ వక్ఫ్ సవరణ బిల్లుకు మద్దతు ఇస్తారా లేదా అనేది ఇప్పుడు రాజ్యసభలో నిర్వహించే ఓటింగ్‌లో కీలకంగా మారింది. వారి ఓట్లే కీలకం కావడంతో రాజ్యసభలో బిల్లు భవితవ్యం తీవ్ర గందరగోళంలో పడింది.